ik be-nam si khoj hai dil ko jis ke asar men rahte hain
ham kaghaz ki naav bana kar roz safar men rahte hain
hone aur na hone ka ik barzakh hai ham jis men hain
jis men shaam ghuli rahti hai aisi sahar men rahte hain
apna to ab is duniya se kuchh aisa hi naata hai
jaise niind men chalne vaale khvab-nagar men rahte hain
pasti aur bulandi kya ab apne khvab hayule bhi
gard ki surat udte hain aur rahguzar men rahte hain
nind-nagar men ja kar huur se pahron baten hoti hain
kaise kaise khvab mire divar-o-dar men rahte hain
ek hava ke jhonke hi se laraz gae hain bam-o-dar
‘shabnam’ aaise lagta hai ham ret ke ghar men rahte hain