un ke siva kisi ko na dekha karenge ham
a.ina-e-nazar ko na maila karenge ham
lo gham ki zindagi bhi hamen raas aa ga.i
lo ab kabhi na aap se shikva karenge ham
charke bahut diye hain vafaon ke rang men
apnon pe ab kabhi na bharosa karenge ham
rusva.iyon ke ḳhauf se aansu bhi pi ga.e
ye kis ne kah diya tumhen rusva karenge ham
ham ko to ai ḳhuda tiri rahmat pe naaz hai
isyan karenge ham kabhi tauba karenge ham
Leave a Reply