Shahnawaz Ansari
faqat ik lafz huun tanha agar tafsil ho ja.un sanvar ja.un
abhi to ḳhaak huun main ḳhaak men tahlil ho ja.un sanvar ja.un
abhi tak shaḳhsiyat ek na-mukammal ḳhvab jaisi hai adhuri hai
kisi din mo.ajiza ho aap hi takmil ho ja.un sanvar ja.un
mujhe shab ke andheron men abhi kitna jhulasna hai samajhna hai
magar jalte hue yunhi kabhi qindil ho ja.un sanvar ja.un
bhaTakta huun tire didar ki ḳhvahish liye aksar kinaron par
tamanna hai tiri ankhon ki gahri jhiil ho ja.un sanvar ja.un
main sang-e-mil ke lahje men sab se baat karta huun so rasta huun
agarche manzilon ki shakl men tabdil ho ja.un sanvar ja.un
shajar ankhon se ojhal na kisi divar ka saaya nazar aaya
ḳhudara ab kisi badal ki hi tamsil ho ja.un sanvar ja.un
Leave a Reply