Chal Nikalti Hain Gham-E-Yar Se Baaten Kya Kya

chal nikalti hain gham-e-yar se baten kya kya

ham ne bhi kiin dar-o-divar se baten kya kya

baat ban aai hai phir se ki mire baare men

us ne puchhin mire gham-ḳhvar se baten kya kya

log lab-basta agar hon to nikal aati hain

chup ke pairaya-e-iz.har se baten kya kya

kisi saudai ka qissa kisi harjai ki baat

log le aate hain bazar se baten kya kya

ham ne bhi dast-shanasi ke bahane ki hain

haath men haath liye pyaar se baten kya kya

kis ko bikna tha magar ḳhush hain ki is hiile se

ho gaiin apne ḳharidar se baten kya kya

ham hain ḳhamosh ki majbur-e-mohabbat the ‘faraz’

varna mansub hain sarkar se baten kya kya

Leave a Comment