aankh men aansu labon par aah dil men dard hai
tere sauda.i ki nazron men to duniya gard hai
ik jhalak dekhi thi us ne un ki auj-e-charḳh par
rashk se mahtab ka chehra abhi tak zard hai
ḳhush-nasiban-e-rah-e-ulfat to manzil pa ga.e
apne hisse men jo aa.i vo safar ki gard hai
meri barbadi ne un ko aur rusva kar diya
ab to duniya kah rahi hai vo baḌa be-dard hai
ibtida-e-ishq ki vo garmi-e-lazzat kahan
ik zamana ho gaya ye aag bilkul sard hai
us ki chhoḌo tum na bhaTko mulkon mulkon pyaar men
‘soz’ to rusva hai divana hai kucha-gard hai
Leave a Reply