Shakeel Azmi
ek suraḳh sa kashti men hua chahta hai
sab asasa mira paani men baha chahta hai
mujh ko bikhraya gaya aur sameTa bhi gaya
jaane ab kya miri miTTi se ḳhuda chahta hai
Tahniyan ḳhushk huiin jhaḌ ga.e patte saare
phir bhi suraj mire paude ka bhala chahta hai
TuuT jaata huun main har roz marammat kar ke
aur ghar hai ki mire sar pe gira chahta hai
sirf main hi nahin sab Darte hain tanha.i se
tirgi raushni virana sada chahta hai
din safar kar chuka ab raat ki baari hai ‘shakil’
niind aane ko hai darvaza laga chahta hai
Leave a Reply