Sabihuddin Shaibi
musalsal mujh pe ye teri inayat maar Dalegi
kabhi furqat kabhi is darja qurbat maar Dalegi
gharib-e-shahr ka kya is ko ghurbat maar Dalegi
amir-e-shahr ko daulat ki chahat maar Dalegi
saḌak par paaya ja.ega kisi din mera bhi lasha
mujhe sach bolte rahne ki aadat maar Dalegi
ye teri dast-giri ek din le Dubegi mujh ko
miri har baat par teri himayat maar Dalegi
agar chahat ki shiddat din-ba-din baḌhti rahi yuun hi
‘sabih’-e-nim-jan tujh ko mohabbat maar Dalegi
Leave a Reply