Poet
sharminda nahin kaun tiri ishva-gari ka
be-vaj.h nahin munh ka chhupana hai pari ka
jo lab ko tire dekh ke behosh na hove
da.ava usi ko bhata hai sahab-jigari ka
tum dil hi men palte rahe ho sikha kahan se
ai ashk ye sheva jo liya parda-dari ka
jis tarah sune mujh se kahe yaar se ja kar
ye Dhab kisi ko aata hai paighambari ka
patthar se hon dil yak-nigah-e-garm men paani
hai ishq se ijad hunar shishagari ka
chal a.ina-ḳhane men ki hai zor-e-tamasha
jis tarf nazar kijiye aalam hai pari ka
afsos shab-e-hijr ki shaam aate hi mar ga.e
kya kya tha bharosa hamen ah-e-sahari ka
kar qatl mujhe shauq se badnami se mat Dar
dastur nahin kushte pe yaan nauhagari ka
hairan huun aa.i na nazar men kamar us ki
da.ava tha mujhe apni ‘raza’ dida-vari ka
Leave a Reply