main jis men kho gaya huun mira khvab hi to hai
yak do nafas numud sahi zindagi to hai
jalti hai kitni der havaon men mere saath
ik shama phir mire liye raushan hui to hai
jis men bhi Dhal gai use mahtab kar gai
mere lahu men aisi bhi ik raushni to hai
parchhaiyon men Dubta dekhun bhi mahr-e-umr
aur phir bacha na paun ye bechargi to hai
tu bu-e-gul hai aur pareshan hua huun main
donon men ek rishta-e-avargi to hai
ai khvab khvab umr-e-gurezan ki saato
tum sun sako to baat miri guftani to hai