Kausar Niyazi
kis qayamat ka na jaane vo andhera hoga
jis ne ḳhurshid-e-jahan-tab ko ghera hoga
haan isi parda-e-zulmat se ubhregi sahar
panja-e-shab se kahan qaid savera hoga
kis se us husn ka afsana kahun jis ke liye
main ne socha bhi nahin tha kabhi mera hoga
raat bhar di hai dar-e-dil pe kisi ne dastak
vo ye kahta hai nahin koi luTera hoga
aaj ji bhar ke use dekh le ‘kausar’ sar-e-bam
jaane un galiyon men phir kab tira phera hoga
Leave a Reply