ameer-minai

Qibla-E-Dil Kaba-E-Jaan Aur Hai

qibla-e-dil kaba-e-jan aur hai

sajda-gah-e-ahl-e-irfan aur hai

ho ke khush katvate hain apne gale

ashiqon ki id-e-qurban aur hai

roz-o-shab yaan ek si hai raushni

dil ke daghon ka charaghan aur hai

khaal dikhlati hai phulon ki bahar

bulbulo apna gulistan aur hai

qaid men aram azadi vabal

ham giraftaron ka zindan aur hai

bahr-e-ulfat men nahin kashti ka kaam

nuuh se kah do ye tufan aur hai

kis ko andesha hai barq o sail se

apna khirman ka nigahban aur hai

dard vo dil men vo siine par hai daagh

jis ka marham jis ka darman aur hai

kaaba-ru mehrab-e-abru ai ‘amir’

apni taaat apna iman aur hai

More Poems

Leave a Comment