Adeem Hashmi
tere liye chale the ham tere liye thahar gae
tu ne kaha to ji uthe tu ne kaha to mar gae
kat hi gai judai bhi kab ye hua ki mar gae
tere bhi din guzar gae mere bhi din guzar gae
tu bhi kuchh aur aur hai ham bhi kuchh aur aur hain
jaane vo tu kidhar gaya jaane vo ham kidhar gae
rahon men hi mile the ham rahen nasib ban gaiin
vo bhi na apne ghar gaya ham bhi na apne ghar gae
vaqt hi judai ka itna tavil ho gaya
dil men tire visal ke jitne the zakhm bhar gae
hota raha muqabla paani ka aur pyaas ka
sahra umad umad pade dariya biphar biphar gae
vo bhi ghubar-e-khvab tha ham bhi ghubar-e-khvab the
vo bhi kahin bikhar gaya ham bhi kahin bikhar gae
koi kanar-e-abju baitha hua hai sar-nigun
kashti kidhar chali gai jaane kidhar bhanvar gae
aaj bhi intizar ka vaqt hunut ho gaya
aisa laga ki hashr tak saare hi pal thahar gae
barish-e-vasl vo hui saara ghubar dhul gaya
vo bhi nikhar nikhar gaya ham bhi nikhar nikhar gae
ab-e-muhit-e-ishq ka bahr ajiib bahr hai
taire to gharq ho gae duube to paar kar gae
itne qarib ho gae apne raqib ho gae
vo bhi ‘adim’ dar gaya ham bhi ‘adim’ dar gae
us ke suluk par ‘adim’ apni hayat o maut hai
vo jo mila to ji uthe vo na mila to mar gae
Leave a Reply