javani yaad ham ko apni phir be-ikhtiyar aai
hua divanon men jab ghul bahar aai bahar aai
hua tha marg se ghafil main kis din josh-e-vahshat men
saba kyuun le ke mere samne musht-e-ghubar aai
dikhae ranj piiri ke ajal tere taghaful ne
tujhe aana tha pahle aah tu anjam kaar aai
hamare tausan-e-umr-e-ravan ke tez karne ko
shamim-e-zulf dosh-e-bad-e-sarsar par savar aai
na paaya vaqt ai zahid koi main ne ibadat ka
shab-e-hijran hui akhir to subh-e-intizar aai
na kuchh khatra khizan ka hai na ehsan-e-bahar us par
adam se apni shakh-e-arzu be-barg-o-bar aai
hamari dekhiyo ghaflat na samjhe vaae nadani
hamen do din ke bahlane ko umr-e-be-madar aai
jo nang-e-ishq hain vo bul-havas fariyad karte hain
lab-e-zakhm-e-‘havas’ se kab sada-e-zinhar aai