ham pe rakhe ga.e ilzam na jaane kya kya
ban ga.e ek mohabbat ke fasane kya kya
manzil-e-dar-o-rasan qaid-e-sitam dasht-e-bala
paa.e hain ahl-e-mohabbat ne Thikane kya kya
koi andaz-e-nadamat koi naala koi ashk
DhunDe hain chashm-e-karam tu ne bahane kya kya
kabhi andhi kabhi tufan kabhi sho.ale kabhi barq
mere gulshan pe bhi guzre hain zamane kya kya
daulat sabr-o-sukun gauhar-e-ashk-e-rangin
ham ne ghurbat men luTa.e ḳhazane kya kya
nazar-e-ahl-e-mohabbat hi samajh sakti hai
lab-e-ḳhamosh pe hote hain fasane kya kya
ab mire samne jab koi gale milta hai
khinch ke aa jaate hain ankhon men zamane kya kiya
kabhi kaliyon ka tabassum kabhi taron ki chamak
dil taḌapne ke bhi hote hain bahane kya kya
kabhi halka sa tabassum kabhi chinpi si nazar
ham se puchho ki lage dil pe nishane kya kya
ham ḳhata-kar-e-mohabbat hain ye ham se puchho
husn-e-ma.asum ko aate hain bahane kya kya
an-ginat roz ḳhayalon ke mahal bante hain
sochta hai dil-e-betab na jaane kya kya
koi ‘sharib’ koi ‘mulla’ koi ‘ghalib’ koi ‘mir’
manzil-e-ishq se guzre hain divane kya kya
Leave a Reply