mohabbat kis se kab ho jaa.e andaza nahin hota
ye vo ghar hai ki jis ka koi darvaza nahin hota
dilon ko dard ki tahzib se abad rakhti hai
mohabbat men kisi ko koi ḳhamyaza nahin hota
kahin koi na koi ik kami baaqi hi rahti hai
mukammal zindagi ka koi shiraza nahin hota
ajab begangi-o-na-shanasa.i ka aalam hai
tiri galiyon men bhi ab mujh pe avaza nahin hota
hamesha hi yahan ik abshar-e-dard bahta hai
ki dil ki mumlikat men koi gham taaza nahin hota
kisi mahbub lamhe men kisi viran raste par
koi kab yaad aa jaa.e ye andaza nahin hota
bahut kuchh dil men hota hai magar ‘ashfaq’ chehre par
kisi ki yaad ka bikhra hua ghaza nahin hota
Leave a Reply