bujhe agar badan ke kuchh charagh tere hijr men
jala liye suḳhan ke kuchh charagh tere hijr men
chaman ḳhizan ḳhizan ho jab bujha bujha hua ho dil
karen bhi kya chaman ke kuchh charagh tere hijr men
shab-e-firaq par hua shab-e-visal ka guman
mahak uThe milan ke kuchh charagh tere hijr men
udasiyon ke habs men jo teri yaad aa ga.i
to jal uThe pavan ke kuchh charagh tere hijr men
so kyon na dil ke daagh gin ke kaaT liije aaj shab
gine the kal gagan ke kuchh charagh tere hijr men
Leave a Reply