ik nuur tha ki pichhle pahar ham-safar hua
mujh ko qaba ka chaak hi chak-e-sahar hua
sailab umand ke shahar ki galiyon men aa gae
lekin gharib-e-shahr ka daman na tar hua
zindan-e-arzu men nazar be-basar rahi
divar dar hui to kiran ka guzar hua
vo andhiyan chali hain ki ashjar ukhaḌ gae
dukkan-e-shishagar pe na phir bhi asar hua
ab kaun dekhta phire kyuun bam-o-dar jale
jo kuchh hua hai fasl-e-chaman se udhar hua