takalluf chhoḌ kar mere barabar baiTh ja.ega
tasavvur men abhi vo paas aa kar baiTh ja.ega
dar-o-divar par itna paḌa hai saare din paani
agar kal dhuup bhi niklegi to ghar baiTh ja.ega
aḌega ḳhud to la.ega ḳhabar saat asmanon ki
uḌaya to parinda chhat ke uupar baiTh ja.ega
na manzil ko pata hoga na raston ko ḳhabar hogi
musafir ek din aram se ghar baiTh ja.ega
ḳhayal achchha hua to sher ban kar aa.ega bahar
bahut achchha hua to dil ke andar baiTh ja.ega
Leave a Reply