Ujala Ku-Ba-Ku Hai Aur Kya Hai

ujala ku-ba-ku hai aur kya hai

mere hamrah tu hai aur kya hai

tire ehsas ki dastak hamesha

ḳhayalon par rafu hai aur kya hai

ye ḳhamoshi achanak lag ga.i jo

musalsal guftugu hai aur kya hai

agarche duur ho nazdik ho par

kamal-e-arzu hai aur kya hai

vahan bas men nahin huun aur sab hai

yahan bas tu hi tu hai aur kya hai

ab is se aur ziyada kya bana.en

tumhari justuju hai aur kya hai