Zakir Khan Zakir
kya bata.en gham-e-furqat men kahan se guzre
mausam-e-gul se jo nikle to ḳhizan se guzre
dil se ankhon se makinon se makan se guzre
dard phir dard hai jab chahe jahan se guzre
husn ki shoḳh-sari ka yahi hasil nikla
atish-e-ishq baḌhi ah-o-fughan se guzre
raqs karte hi rahe ḳhvab dhunon par lekin
saans ke taar sabhi soz-e-nihan se guzre
ba-vazu ho ke mira zikr jo karte the kabhi
aaj palTe hain zaban se vo bayan se guzre
vo mohabbat ho ke isar-o-vafa ho ‘zakir’
ishq ke tiir shab-o-roz kaman se guzre
Leave a Reply