ba-vasf-e-shauq bhi dil ka kaha nahin karte
farogh-e-qamat-o-rukh ki sana nahin karte
shikast-e-ahd-e-sitam par yaqin rakhte hain
ham intiha-e-sitam ka gila nahin karte
kuchh is tarah se luti hai mata-e-dida-o-dil
ki ab kisi se bhi zikr-e-vafa nahin karte
isi liye hain sazavar-e-jaur-e-barq-e-sitam
ki haqq-e-khidmat-e-gulchin ada nahin karte
mazaq-e-kohkani ho ki dasht-paimai
jinhen tumhari talab ho vo kya nahin karte
vo ashna-e-gham-e-kainat kya honge
jo khud ko aap ka dard-ashna nahin karte
gham-e-habib gham-e-zindagi gham-e-dauran
kisi maqam pe ham ji bura nahin karte
Leave a Reply