Shayan Quraishi
safar kahne ko jaari hai magar azm-e-safar gha.eb
ye aisa hai ki jaise ghar se hon divar-o-dar gha.eb
hazaron mushkilen aa.iin vafa ki raah men mujh par
kabhi manzil hui ojhal kabhi rah-e-safar gha.eb
ajab manzar ye dekha hai ḳhirad valon ki basti men
yahan sar to salamat the magar fikr-o-nazar gha.eb
hasin mausam ne nazren pher liin apne taghaful par
hue raftar-e-duniya ke sabab sham-o-sahar gha.eb
parindo lauT kar aana zara jaldi uḌanon se
na ho jaa.en kahin angan se ye buḌhe shajar gha.eb
ye kis ki surḳhi-e-ruḳh shaam ke chehre pe utri hai
ki jis ke rang men mil kar hue zaḳhm-e-jigar gha.eb
kami pahle hi thi shayan ahl-e-zarf ki lekin
nazar se ho rahe hain aaj kal ahl-e-nazar gha.eb
Leave a Reply