Yasmin Husaini Zaidi Nikhat
mohabbaten to milin go vafa mili na mili
safar hasin tha manzil ka kya mili na mili
na doston se tavaqqo na dushmanon se gurez
ye dil tha gor-e-ghariban sham.a jali na jali
ajab sa habs hai insaniyat ke zehnon men
kise ho fikr ki bad-e-saba chali na chali
tire visal ke lamhon ko munjamid kar luun
shab-e-firaq ka kya hai Dhali Dhali na Dhali
hamara ishq bhi had se guzarna chahta hai
ki dil ho mahv-e-takallum nazar mili na mili
nahin hai fikr koi baghban ko ‘nik.hat’
bahar aa.i na aa.i kali khili na khili
Leave a Reply