ḳhushbu hai kabhi gul hai kabhi sham.a kabhi hai
vo atish-e-sayyal jo siine men bhari hai
bada-talbi shauq ki daryuza-gari hai
sad-shukr ki taqdir hi yaan tishna-labi hai
ghunchon ke chaTakne ka saman dil men abhi hai
milne men jo uTh uTh ke nazar un ki jhuki hai
ab zabt se kah de ki ye ruḳhsat ki ghaḌi hai
ai vahshat-e-gham der se kya soch rahi hai
masum hai yaad un ki bhaTak jaa.e na rasta
ḳhun-gashta tamannaon ki kyuun bhiiḌ lagi hai
yadon se kaho sola-singar aaj kara.en
a.ina-ba-kaf hasrat-e-didar khaḌi hai
lab si liye andesha-e-dushnam-e-jahan se
ab apni ḳhamoshi hi ik afsana bani hai
Thahri hai to ik chehre pe Thahri rahi barson
bhaTki hai to phir aankh bhaTakti hi rahi hai
Leave a Reply