dasht ko DhunDne niklun to jazira nikle
paanv rakhkhun jo main virane men duniya nikle
ek biphra hua dariya hai mire chaar taraf
tu jo chahe isi tufan se kinara nikle
ek mausam hai dil o jaan pe faqat din ho ki raat
asman koi ho dil par vahi taara nikle
dekhta huun main tiri raah men dam-e-hairat
raushni raat se aur dhuup se saaya nikle
is se pahle ye kabhi dil ne kaha hi kab tha
raat kuchh aur baḌhe chand dobara nikle
aankh jhukti hai to milti hai ḳhamoshi ko zaban
band honTon se koi bolta dariya nikle
ishq ik aisi haveli hai ki jis se bahar
koi darvaza khule aur na daricha nikle
sehr ne tere ajab raah sujha.i hamdam
ham kahan jaane ko nikle the kahan aa nikle
Leave a Reply