Kuchh Aise Log Bhi Duniya Mein Pae Jate Hain

kuchh aise log bhī duniyā meñ paa.e jaate haiñ

jahāñ bhī jaa.eñ diye hī jalā.e jaate haiñ

ye āzmā.isheñ yuuñ hī atā nahīñ hotīñ

jo log ḳhaas hoñ vo āzmā.e jaate haiñ

hameñ husain se paiġhambaroñ se nisbat hai

hamāre is liye bhī dil dukhā.e jaate haiñ

vo shaḳhs sūrat-e-ḳhurshīd jab nikaltā hai

to rang-o-nūr meñ ham bhī nahā.e jaate haiñ

use bhī pyaar hai un se jo dil-shikasta hoñ

so us kī bazm meñ ham bhī bulā.e jaate haiñ

maiñ apne dil se pareshān huuñ kidhar jā.ūñ

jo bevafā the use yaad aa.e jaate haiñ

to kul milā ke mujhe baat ye samajh aa.ī

jo nek log hoñ aksar satā.e jaate haiñ

duā salām na hadd-e-adab na ijz-o-ḳhulūs

ye mere shahr meñ ab kaun aa.e jaate haiñ

ajiib log haiñ shā.ir bhī ye ḳhudā jaane

koī sune na sune ye sunā.e jaate haiñ

mirā yaqīn hai ye ḳhāmushī ye gahrā sukūt

ye log ḳhud nahīñ aate ye laa.e jaate haiñ

Leave a Comment