dil ke bahlane ka saman na samjha jaae
mujh ko ab itna bhi asan na samjha jaae
main bhi duniya ki tarah jiine ka haq mangti huun
is ko ghaddari ka elaan na samjha jaae
ab to bete bhi chale jaate hain ho kar rukhsat
sirf beti ko hi mehman na samjha jaae
meri pahchan ko kaafi hai agar meri shanakht
mujh ko phir kyuun miri pahchan na samjha jaae
main ne ye kab kaha ‘ruhi’ ki mire jivan men
mere sain ko miri jaan na samjha jaae
Leave a Reply