ḳhaak hoti hui ta.amir se Dar jaate hain
ham badalti hui tasvir se Dar jaate hain
raat ko chain se sote hain magar vaqt-e-sahar
ḳhvab ke va.ada-e-tabir se Dar jaate hain
vo siyahi se likhi hoti hai ḳhuun se to nahin
phir bhi kyuun aap ki tahrir se Dar jaate hain
DhunDte phirte hain saḌkon pe ujale lekin
ghar men aati hui tanvir se Dar jaate hain
aap to nahr kinare pe kiye hain qabza
aap kyuun pyaas ke ik tiir se Dar jaate hain
raqs karte hue mahlon ki fasilon pe charagh
aap ki di hui tauqir se Dar jaate hain
Leave a Reply