Muqabla Hai Gham-O-Alam Ka to Samna Ranj-O-Be-Kasi Ka

muqabla hai gham-o-alam ka to samna ranj-o-be-kasi ka

rah-e-mohabbat men har qadam par nishan milta hai zindagi ka

isi mohabbat men ham pe guzra ik aisa aalam bhi tirgi ka

bana liya aftab ham ne mila jo zarra bhi raushni ka

yakayak ik huuk dil men uTThi palaT gaya rang zindagi ka

ba-ḳhair yadash mire labon par abhi abhi naam tha kisi ka

jahan se dekho fasana-e-gham bani hui iztirab-e-paiham

hon teri nazren bhi jis se barham karenge kya aisi zindagi ka

ye ahd-e-gham ki nahin hikayat thi is se pahle bhi aisi halat

vahin pe Thahri nigah-e-ulfat jo rang dekha shikastagi ka

jo dil pe paiham hai barish-e-gham mohabbaten ho rahi hain mohkam

izafa karta hai zindagi men jo din guzarta hai zindagi ka

bayan-e-gham ki latafaten hain mohabbaton ki nazakaten hain

vagarna ‘ehsas’ sach to ye hai saliqa kya mujh ko sha.iri ka