vaqt ke kitne hi dharon se guzarna hai abhi
zindagi hai to ka.i rang se marna hai abhi
kaT gaya din ka dahakta hua sahra bhi to kya
raat ke gahre samundar men utarna hai abhi
zehn ke reze to phaile hain faza men har su
jism ko TuuT ke har-gam bikharna hai abhi
ye saje baam javan chandni yuun lagta hai
ik sitam aur tire shahr ne karna hai abhi
ek ik rang uḌa le ga.i be-mehr hava
kitne ḳhake hain jinhen ‘sham’ ji bharna hai abhi
Leave a Reply