raat sī niiñd hai mahtāb utārā jaa.e
ai ḳhudā mujh meñ zar-e-ḳhvāb utārā jaa.e
kyā zarūrī hai ki naav ko bachāne ke liye
har musāfir tah-e-girdāb utārā jaa.e
roz utartā hai samundar meñ sulagtā sūraj
kabhī sahrā meñ bhī tālāb utārā jaa.e
sau charāġhoñ ke jalāne se kahīñ achchhā hai
ik sitāra sar-e-mehrāb utārā jaa.e
pattharoñ meñ bhī ka.ī pech paḌe haiñ ‘shāhid’
un pe bhī mausam-e-shādāb utārā jaa.e