Ye dil Ki dastan Hai Ki dil Ghulam Kar diya

Sabiha Saba

ye dil ki dastan hai ki dil ghulam kar diya

ajiib log aap hain ajiib kaam kar diya

tumhari ye sakhvaten tumhari ye inayaten

jo gham tumhare paas tha hamare naam kar diya

dilon ka bhed khul gaya to phir ajiib rang men

dabi dabi si baat ko kisi ne aam kar diya

kisi ko surkh-ru kiya kisi ki bazm-e-shauq men

zara zara si baat par ye ehtimam kar diya

kabhi hamen bura laga kabhi hamen bhala laga

hamare dil ki baat ko kisi ne aam kar diya

udaan khub-tar hui jo panchhiyon ki daar ki

to gher-ghar kar kisi ne zer-e-dam kar diya