sham-e-mazar thi na koi sogvar tha
tum jis pe ro rahe the ye kis ka mazar tha
taḌpunga umr-bhar dil-e-marhum ke liye
kam-baḳht na-murad laḌakpan ka yaar tha
sauda-e-ishq aur hai vahshat kuchh aur shai
majnun ka koi dost fasana-nigar tha
jaadu hai ya tilism tumhari zaban men
tum jhuuT kah rahe the mujhe e’tibar tha
kya kya hamare sajde ki rusva.iyan huiin
naqsh-e-qadam kisi ka sar-e-rahguzar tha
is vaqt tak to vaz.a men aaya nahin hai farq
tera karam sharik jo parvardigar tha
Leave a Reply