men sochta huun jise ashna bhi hota hai
magar ḳhayal se vo mavara bhi hota hai
siva.e sha.iri zindan men kuchh kiya hi nahin
vagarna band-e-qafas kholna bhi hota hai
ziyada-tar main anasir se duur dekhun use
vo ḳhaak o atish o aab o hava bhi hota hai
main TuuT jaata huun aur duur ja bikharta huun
agar juda.i ka sadma zara bhi hota hai
har ek raste par ham to ja ke dekhen magar
jidhar na jaana ho vo rasta bhi hota hai
usi ke dar ke faqat ho ke rah ga.e hain ham
suna hai jab se ki darvaza va bhi hota hai
‘zafar’ vahan ki jahan ho koi bhi had qaa.em
faqat bashar nahin hota ḳhuda bhi hota hai
Leave a Reply