Fana Nizami Kanpuri
jhuTi hi tasalli ho kuchh dil to bahal jaa.e
dhu.dli hi sahi lekin ik sham.a to jal jaa.e
is mauj ki Takkar se sahil bhi larazta hai
kuchh roz to tufan ki aghosh men pal jaa.e
majburi-e-saqi bhi ai tishna-labo samjho
vaa.iz ka ye mansha hai mai-ḳhvaron men chal jaa.e
ai jalva-e-janana phir aisi jhalak dikhla
hasrat bhi rahe baaqi arman bhi nikal jaa.e
is vaste chheḌa hai parvanon ka afsana
shayad tire kanon tak paigham-e-amal jaa.e
mai-ḳhana-e-hasti men mai-kash vahi mai-kash hai
sambhle to bahak jaa.e bahke to sambhal jaa.e
ham ne to ‘fana’ itna mafhum-e-ghazal samjha
ḳhud zindagi-e-sha.er ash.ar men Dhal jaa.e
Leave a Reply