Abdussalam Asim
baras ke bhi na mire kaam aa saki barish
abhi vo khul hi rahe the ki dhul gai barish
bujha saki na kisi taur meri ruuh ki pyaas
badan ki had se tajavuz na kar saki barish
ajab nahin ki jigar tak utar gai hoti
hamare saath agar khud bhi bhigti barish
hai zikr-e-yar isi iltizam se rangin
mahakta jism javan raat be-khudi barish
hamin fareb-e-nazar ka shikar hote rahe
hava ke saath badalti thi samt bhi barish
kabhi to raaz dilon ke tatolti ‘asim’
kabhi to jhankti ankhon men sar-phiri barish
Leave a Reply