Sardar Saleem
ḳhamoshi men chhupe lafzon ke huliye yaad a.enge
tiri ankhon ke be-avaz lahje yaad a.enge
tasavvur Thokaren khate hue qadmon se uljhega
ubharti Dubti manzil ke raste yaad a.enge
mujhe ma.alum hai dam toḌ degi agahi meri
jo lamhe bhulne ke hain vo lamhe yaad a.enge
kabhi apne akele-pan ke baare men jo sochoge
tumhen TuuTe hue kuchh ḳhaas rishte yaad a.enge
kuchh aisa ho ki tasviron men jal jaa.e tasavvur bhi
mohabbat yaad aa.egi to shikve yaad a.enge
jo tera jism chhu kar meri sanson men samate the
har aahaT par vahi ḳhushbu ke jhonke yaad a.enge
bhale auraq-e-mazi chaaT jaa.e vaqt ki dimak
jo qisse yaad aane hain vo qisse yaad a.enge
jahan tum se bichhaḌne ka sabab ankhen bhigo.enge
vahin apni mohabbat ke vasile yaad a.enge
‘salim’ aḳhir ga.e vaqton ki qabren khodiye kyun-kar
dil-e-masum ko apne khilaune yaad a.enge
Leave a Reply