irada ho aTal to mo.ajaza aisa bhi hota hai
diye ko zinda rakhti hai hava aisa bhi hota hai
suna.i de na ḳhud apni sada aisa bhi hota hai
miyan tanha.i ka ik saneha aisa bhi hota hai
chhiḌe hain taar dil ke ḳhana-barbadi ke naghme hain
hamare ghar men sahib rat-jaga aisa bhi hota hai
bahut hassas hone se bhi shak ko raah milti hai
kahin achchha to lagta hai bura aisa bhi hota hai
kisi ma.asum bachche ke tabassum men utar jaao
to shayad ye samajh paao ḳhuda aisa bhi hota hai
zaban par aa ga.e chhale magar ye to khula ham par
bahut miThe phalon ka za.iqa aisa bhi hota hai
Leave a Reply