chaar janib se sada aa.i miri
sho.abada ban ga.i tanha.i miri
maut ko jab se muqabil dekha
zindagi ho ga.i shaida.i miri
ab bhi yaran-e-girafta-dil ko
yaad hai anjuman-ara.i miri
lab-kusha.i se mili rif.at-e-dar
kis bulandi pe hai goya.i miri
raat phaili to sar-e-ḳhalvat-e-gham
be-karan ban ga.i tanha.i miri
sub.h chamki to ghubar-e-shab se
be-muhabana sada aa.i miri
umr bhar mera muḳhatib vo tha
baat jis ko na samajh aa.i miri
dil-e-nadan ne Duboya ‘mohsin’
kaam kuchh aa.i na dana.i miri
Leave a Reply