Suroor Barabankvi
soz-e-gham bhi nahin fughan bhi nahin
jal bujhi aag ab dhuan bhi nahin
tu ba-zahir vo mehrban bhi nahin
mannaten meri ra.egan bhi nahin
jaane kyuun tum se kuchh nahin kahte
varna ham itne be-zaban bhi nahin
vo nigahen ki be-niyaz bhi hain
aur un se kahin amaan bhi nahin
dida-o-dil hain kab se chashm-ba-rah
koi uftad-e-na-gahan bhi nahin
ai ḳhusha karobar-e-shauq ‘surur’
naf.a kuchh ho na ho ziyan bhi nahin
Leave a Reply