Rizq Ki Justuju Mein Kise Thi KHabar Tu Bhi Ho Jaega Raegan Ya aKHi

Irfan Sattar

rizq ki justuju men kise thi ḳhabar tu bhi ho ja.ega ra.egan ya aḳhi

teri asuda-hali ki ummid par kar ga.e ham to apna ziyan ya aḳhi

jab na tha ye bayaban-e-divar-o-dar jab na thi ye siyahi bhari rahguzar

kaise karte the ham guftugu raat bhar kaise sunta tha ye asman ya aḳhi

jab ye ḳhvahish ka amboh-e-vahshat na tha shahr itna tahi-dast-e-fursat na tha

kitne abad rahte the ahl-e-hunar har nazar thi yahan mehrban ya aḳhi

ye giroh-e-asiran-e-kizb-o-riya bandagan-e-diram bandagan-e-ana

ham faqat ahl-e-dil ye faqat ahl-e-zar umr kaise kaTegi yahan ya aḳhi

ḳhud-kalami ka ye silsila ḳhatm kar gosh-o-avaz ka fasla ḳhatm kar

ik ḳhamoshi hai phaili hui sar-basar kuchh suḳhan chahiye darmiyan ya aḳhi

jism ki ḳhvahish se nikal kar chalen zaviya justuju ka badal kar chalen

DhunDne agahi ki koi rahguzar ruuh ke vaste sa.eban ya aḳhi

haan kaha tha ye ham ne bichhaḌte hue lauT a.enge ham umr Dhalte hue

ham ne socha bhi tha vapsi ka magar phir ye socha ki tu ab kahan ya aḳhi

ḳhud-shanasi ke lamhe baham kab hue ham jo the dar-haqiqat vo ham kab hue

tera ehsan ho tu bata de agar kuchh hamen bhi hamara nishan ya aḳhi

qissa-e-ranj-o-hasrat nahin muḳhtasar tujh ko kya kya bata.egi ye chashm-e-tar

atish-e-gham men jalte hain qalb-o-jigar aankh tak aa raha hai dhuan ya aḳhi

tu hamen dekh aa kar sar-e-anjuman yuun samajh le ki hain jan-e-bazm-e-shuḳhan

ik to rudad dilchasp hai is qadar aur us par hamara bayan ya aḳhi

umr ke baab men ab ri.ayat kahan samt tabdil karne ki mohlat kahan

dekh bad-e-fana khaTkhaTati hai dar ḳhatm hone ko hai dastan ya aḳhi

ho chuka sab jo hona tha sud-o-ziyan ab jo sochen to kya rah gaya hai yahan

aur kuchh fasle ka ye raḳht-e-safar aur kuchh roz ka naqd-e-jan ya aḳhi