jan-e-muztar ko na ho kyuun dil-e-betab se haz
hota ahbab ko hai sohbat-e-ahbab se haz
nigah-e-mast se paata hai vo dil kaifiyyat
ho.e maḳhmur ko jis tarah mai-e-nab se haz
kya kahun furqat-e-janan men ki jo guzre hai
puchhe ab is ka koi mahi-e-be-ab se haz
ahl-e-dil paate hain jam.iyyat-e-dil se lazzat
ahl-e-duniya ko hai jam.iyyat-e-asbab se haz
dekh kar ru-e-butan jaan maza paati hai
andalibon ko na ho kyuun gul-e-shadab se haz
karta bad-haz hai faqat tala-e-bedar ko ḳhvab
varna har jagne vaale ko mila ḳhvab se haz
jab na ho saath vo mah-ru shab-e-mahtab men ‘aish’
kya uThe ḳhaak batao shab-e-mahtab se haz
Leave a Reply