Jafar Tahir
gham-e-dauran gham-e-janan gham-e-jan hai ki nahin
dil-sitan silsila-e-gham-zadagan hai ki nahin
har nafas bazm-e-gulistan men ghazal-ḳhvan tha kabhi
har nafas nala-kashan nauha-kunan hai ki nahin
har nazar naghma-sara anjuman-ara thi kabhi
har nazar hairati-e-rang-e-jahan hai ki nahin
har zaban par tha kabhi tazkira-e-daur-e-bahar
har zaban shikva-gar-e-jaur-e-ḳhizan hai ki nahin
mai-chakan bada-nishan the lab-e-gul-rang kabhi
lab-e-gul-rang pe zaḳhmon ka guman hai ki nahin
surma-e-chashm-e-inayat ki hikayat chhoḌo
aaj har aankh men aahon ka dhuan hai ki nahin
qafile jaane ghaTaon ke kahan utrenge
har ḳham-e-zulf ba-hasrat-nigaran hai ki nahin
dasht-e-vahshat se nahin kam ye jahan-e-gul-o-bu
surat-e-reg-e-ravan umr-e-ravan hai ki nahin
naghma-e-bad-e-bahari jise tum kahte ho
jaras-e-qafila-e-gul ki fughan hai ki nahin
na to bulbul ki nava hai na sada-e-ta.us
sehn-e-gulzar men ab amn-o-aman hai ki nahin
mujh se kya puchhte ho kaun yahan tak pahuncha
surḳhi-e-ḳhar-e-bayaban se ayaan hai ki nahin
zindagi kuchh bhi sahi phir bhi baḌi daulat hai
maut si shai bhi yahan jins-e-giran hai ki nahin
surat-e-lutf-o-karam ye ho to dil kyuun na jale
aag patthar ke bhi siine men nihan hai ki nahin
zulm chup-chap sahe jaoge aḳhir kab tak
ai asiran-e-qafas munh men zaban hai ki nahin
ye adab-gah-e-mohabbat hai jo chup huun ‘tahir’
varna yaan kaun sa andaz-e-bayan hai ki nahin
Leave a Reply