mere samne mere ghar ka puura naqsha bikhra hai
kaash koi aisa hota jo dekhe kya kya bikhra hai
main ne chaha biite barson ko bhi muTThi men bhar luun
is koshish men mere aaj ka lamha lamha bikhra hai
pahle us ke saa.e ke rasiya log the ab ye kahte hain
ye bhi koi peḌ hai jis ka patta patta bikhra hai
shayad aise hi be-manzil rahna apni qismat hai
ham kis raste ko apna.en har ik rasta bikhra hai
is ki kya ta.abir karun main kuchh tu hi samjha ‘manzur’
main ne ḳhvab men dekha sahra men ik dariya bikhra hai
Leave a Reply