Umair Najmi
ek tariḳh muqarrar pe to har maah mile
jaise daftar men kisi shaḳhs ko tanḳhvah mile
rang ukhaḌ jaa.e to zahir ho plastar ki nami
qahqaha khod ke dekho to tumhen aah mile
jam.a the raat mire ghar tire Thukra.e hue
ek dargah pe sab randa-e-dargah mile
main to ik aam sipahi tha hifazat ke liye
shah-zadi ye tira haq tha tujhe shaah mile
ek udasi ke jazire pe huun ashkon men ghira
main nikal ja.un agar ḳhushk guzargah mile
ik mulaqat ke Talne ki ḳhabar aise lagi
jaise mazdur ko haḌtal ki afvah mile
ghar pahunchne ki na jaldi na tamanna hai koi
jis ne milna ho mujhe aa.e sar-e-rah mile
Leave a Reply