Pani Mein Bhi Pyas Ka Itna Zahr Mila Hai

paanī meñ bhī pyaas kā itnā zahr milā hai

hoñToñ par aate har qatra suukh rahā hai

andhe ho kar bādal bhāge phirte haiñ

gaate gaate ek parinda aag huā hai

phuul aur phal to taaza koñpal par aate haiñ

piilā patta is vahshat meñ TuuT rahā hai

gardish gardish chalne se hī kaT pā.egā

chāroñ jānib ek safar kā jaal bichhā hai

usī peḌ ke nīche dafn bhī honā hogā

jis kī jaḌ par maiñ ne apnā naam likhā hai

Leave a Comment