Sahab Qazalbash
ghamon ke zaḳhm uThate rahe ḳhushi ke liye
taras ga.e hain mohabbat ki zindagi ke liye
kali tabassum-e-be-saḳhta se phuul bani
ye lamha kaafi hai ab puuri zindagi ke liye
ghurub-e-mehr pe kis ne lahu chaḌhaya hai
ye kis ne ḳhuun jalaya hai raushni ke liye
ye kaisi dil ki lagi hai ki apni umr-e-aziz
miTa.e dete hain ham ek ajnabi ke liye
ḳhud apne jaisa hi insan zindagi mange
ye kaisa vaqt-e-ḳhuda.i hai aadmi ke liye
abhi na toḌo umid-e-vafa ke phulon ko
mujhe to un ka bharosa tha zindagi ke liye
Leave a Reply