Ab Ghair Se Bhi Teri Mulaqat Rah Gai

Meer Asar

ab ghair se bhi teri mulaqat rah ga.i

sach hai ki vaqt jaata raha baat rah ga.i

teri sifat se na raha kaam kuchh mujhe

bas teri sirf dosti bizzat rah ga.i

kahne laga vo haal mira sun ke raat ko

sab qisse ja chuke ye ḳhurafat rah ga.i

din intizar ka to kaTa jis tarah kaTa

lekin kaso tarah na kaTi raat rah ga.i

bas naqd-e-jan hi sirf ‘asar’ ne kiya nisar

gham ki tire sab aur mudarat rah ga.i