Ranai-E-Kaunain Se Be-Zar Hamin The

rana.i-e-kaunain se be-zar hamin the

ham the tire jalvon ke talabgar hamin the

hai farq talabgar o parastar men ai dost

duniya thi talabgar parastar hamin the

is banda-navazi ke tasadduq sar-e-mahshar

goya tiri rahmat ke saza-var hamin the

de de ke nigahon ko tasavvur ka sahara

raton ko tire vaste bedar hamin the

bazar-e-azal yuun to bahut garm tha lekin

le de ke mohabbat ke ḳharidar hamin the

khaTke hain tire saare gulistan ki nazar men

sab apni jagah phuul the ik ḳhaar hamin the

haan aap ko dekha tha mohabbat se hamin ne

ji saare zamane ke gunahgar hamin the

hai aaj vo surat ki bana.e nahin banti

kal naqsh-e-do-alam ke qalamkar hamin the

pachhtaoge dekho hamen begana samajh kar

manoge kisi vaqt ki gham-ḳhvar hamin the

arbab-e-vatan ḳhush hain hamen dil se bhula kar

jaise nigah o dil pe bas ik baar hamin the

‘ehsan’ hai be-sud gila un ki jafa ka

chaha tha unhen ham ne ḳhata-var hamin the