aise men roz roz koi DhunDta mujhe
avaz de rahi thi udhar ki hava mujhe
aisa hua ki ghar se na nikla tamam din
jaise ki ḳhud se aaj koi kaam tha mujhe
parde ke as-pas koi baagh hi na ho
khiḌki khuli to phuul ka dhoka hua mujhe
ye peḌ jis pe phuul na patti na Tahniyan
das biis saal ba.ad jo ḳhud sa laga mujhe
main aaj bhi vahi huun vafa thi jise aziiz
fursat mile to aa ke kabhi dekh ja mujhe
ankhon men dil utar paḌa a.ina dekh kar
aaya tha ik ḳhayal bahut duur ka mujhe
ye fikr aa paḌi hai ki badle ga.e na hon
saa.e se kah raha huun zara dekhna mujhe
kahte hain yar-dost agar bevafa kahen
ai ‘ashk’ ansuon ne bhi kya de diya mujhe
Leave a Reply